Канон священномученику Аввакуму

Главная Публикации Канон священномученику Аввакуму

Темы публикаций

Канон священномученику Аввакуму

Тропарь, глас 4-й. И нра́вом прича́стник, и престо́лом наме́стник, апо́столом бы́в. Дея́нии обре́те богодохнове́нне в виде́ниих восхо́д. Сего́ ра́ди сло́во и́стинное исправля́я, и за ве́ру пострада́л еси́ до́ крове. Священному́чениче Авва́куме, моли́ Христа́ Бо́га, спасти́ся душа́м на́шим.

Слава, и ныне. Богородичен. Иже  о́т века утае́нное, и А̒нгелом несве́домое та́иньство, Тобо́ю Богоро́дице земны́м яви́ся Бо́г, в неразме́сне сня́тии воплоща́емь, и Кре́ст во́лею на́с ра́ди восприе́м, И́мже воскреси́ Первозда́ннаго, и спасе́ от сме́рти душа́ на́ша.

Канон, глас 2-й

Песнь 1-я. Ирмос. Гряди́те лю́дие пое́м пе́снь Христу́ Бо́гу, разде́льшему мо́ре, и прове́дшему лю́ди, и́х же изпусти́ из рабо́ты еги́петския, я́ко просла́вися.

Запев: Святы́и священному́чениче Авва́куме, моли́ Бо́га о на́с (поклон).

Запев. Христо́вым светоли́тием просвеща́ем, священному́чениче сла́вне Авва́куме, моли́твами твои́ми преблаже́нне, омра́чную ду́шю мою́ просвети́, я́ко да воспева́ю тя́.

Запев. Просвеще́ние спасе́ннаго пропове́дания, чи́стому се́рдцу твоему́, я́ко зерца́ло нескве́рное о́тче возсия́в, лучи́ все́м изпусти́л еси́.

Слава. Посто́м свои́м страстна́я игра́ния вся́, и воздержа́нием жела́ние претвори́л еси́. И разли́чными по́двиги взя́тся, к безстра́стней высоте́.

И ныне. Богородичен. Бо́га из Тебе́ вопло́щьшагося све́мы, безсе́меннаго хоте́ния, су́щаго пре́жде всея́ тва́ри, и пре́жде все́х ве́к. Те́м же Тя́ су́щую Богоро́дицу воспева́ем.

Катавасия. Изба́ви от бе́д ра́бы своя́, святы́и священному́чениче Авва́куме, я́ко вси́ По́ Бозе к тебе́ Прибега́ем, ты́ бо мо́лиши о на́с Христа́ Бо́га на́шего (поклон). Го́споди по́милуй (трижды с поклонами).
 

Песнь 3-я. Ирмос. Утверди́ на́с Собо́ю Го́споди, дре́вом умерщве́и прегреше́ния. И стра́х Тво́й всади́ в сердца́ на́ша, я́ко Человеколю́бец.

Запев. Всесверше́ну же́ртву жи́ву, себе́ Христо́ви прине́сл еси́ муче́нием. Со́вестию му́ченическою, преди́ пострада́ воздержа́нием.

Запев. Житие́ твое́ свяще́нно, и сло́во боже́ственно. И дея́ния боже́ственная прие́млюще, возхожде́ния в се́рдцы свое́м, и́стиннаго боговиде́ния, его́ же получи́л еси́.

Слава. Упра́вив богоразу́мно преподо́бне у́м сво́й, заповедьми́ Спа́совыми, досто́ин яви́ся, и ве́ре побо́рник непобеди́мыи.

И ныне. Богородичен. От ме́ртвости у́м на́ш оттрясла́ еси́, ро́ждьши су́щее безсме́ртие. И оде́жду на́м изтка́ла еси́ нетле́ния Деви́це, рожество́м Свои́м.

Катавасия. Го́споди поми́луй (трижды с поклонами).

Седален, глас 3-й. Бо́жиим Ду́хом просвеще́н, де́рзость мучи́тельскую, дерзнове́нием священному́чениче великому́дрене посрами́л еси́. И преплы́л еси́ Ле́стную пучи́ну, и ко приста́нищу боже́ственному приста́л еси́. О́тче преподо́бне, Христа́ Бо́га моли́, дарова́ти на́м ве́лию ми́лость.

Слава, и ныне. Богородичен. Ко́ждо иде́же спаса́ется, в пра́вду та́мо прибега́ет. И ко́е и́но таково́ прибе́жище, я́ко Твое́ Богоро́дице, покрыва́ющее душа́ на́ша.
 

Песнь 4-я. Ирмос. Услы́шах Го́споди сла́вное Твое́ смотре́ние, и просла́вих Милосе́рде, непости́жимую Твою́ си́лу.

Запев. Всесожже́ние боже́ственно ты́, и чи́ста же́ртва принесеся Спа́су все́х, священному́чениче прему́дре.

Запев. Ста́до Христо́во преподо́бне, наставля́я к све́ту богоразу́мия, и безбо́жия тму́ отгна́л еси́.

Слава. Безбо́жия глубину́, реко́ю твои́х пото́в о́тче, я́ко священному́ченик изсуши́л еси́.

И ныне. Богородичен. Просвети́ Пречи́стая омраче́нную ду́шу мою́, све́том Твои́м, я́же Све́т ро́ждьши еди́н соста́вныи.

Катавасия. Го́споди помилуй (трижды с поклонами).  

Песнь 5-я. Ирмос. Све́та пода́телю, и веко́м тво́рче Го́споди, во́ свете Тво́их повеле́нии наста́ви на́с. Ра́зве бо Тебе́ ино́го Бо́га не зна́ем.

Запев. Бога́тство и сла́ву све́тлую, и долготу́ жи́зни, и живо́т нетле́нен, и́стинная прему́дрость Христо́с, тебе́ дарова́ Блаже́нне, я́ко изря́дне то́го возлю́бльшу.

Запев. Жезло́м ве́ры отгоня́еши ересе́м лови́твы, и сою́зом любве́ спря́г ста́до свое́, наде́жею и ве́рою сохраня́еши невре́дно.

Слава. Отрази́ Воздержа́нием пи́щу, накорми́л еси́ ду́шу свою́, пи́щу имея́ непрест́анныя моли́твы и поуче́ние, и е́же к Бо́гу вознося́щее смире́ние.

И ныне. Богородичен. Тя́ засту́пницу Чи́стая, и наде́жу тве́рду и держа́ву и покро́в, и сте́ну стяжа́хом вси́, и в Ца́рство Небе́сное вводя́щии мо́ст.

Катавасия. Го́споди поми́луй (трижды без поклонов). Слава, и ныне.

Песнь 6-я. Ирмос. В бе́здне грехо́вней одержи́м, неизсле́дную милосе́рдия Твоего́ призыва́ю бе́здну, от тли́ Бо́же мя́ возведи́.

Запев. Же́ртва и жри́тель бы́в, поже́рл еси́ себе́ Бо́гови ве́ры ра́ди. И соблюда́еши безскве́рнено тому́, служи́тельства своего́ Сверше́ние.

Запев. Умертви́ся богоглаго́ливе ми́ру всему́, Еди́ному же Бо́гу жи́в пребыва́я. Ко Христо́ви преста́вися, живото́м нетле́нным обогаща́ем.

Слава. Ны́не в безконе́чную сла́ву преше́д от земли́, окаля́нную ду́шю мою́ страстьми́, преподо́бне приле́жным очище́нием твоея́ моли́твы уврачу́й.

И ныне. Богородичен. Взе́млющаго грехи́ всего́ ми́ра, Пречи́стая Христа́ заче́нши, Пренепоро́чная непреста́й прося́щи, грехо́в проще́ния рабо́м Твои́м.

Катавасия. Го́споди поми́луй (трижды с поклонами).

Кондак, глас 4-й. В святи́телех благоче́стно пожи́в, и муче́ния пу́ть проше́д, и́дольския угаси́л еси́ же́ртвы, и побо́рник бы́в своему́ ста́ду богому́дре. Те́м же тя́ почита́юще вопие́м ти́, от бе́д изба́ви ны́, при́сно свои́ми мольба́ми о́тче на́ш, Авва́куме.

Икос. Ве́рно любо́вию совоку́пльшеся, в па́мять свяще́ннаго страда́льца, и сего́ пе́сньми восхва́лим дне́сь, я́ко да благода́ти от него́ наслади́мся. Ду́ши бо спаса́ет от страсте́й и бе́д, я́ко му́ченик, и я́ко ве́рен святи́тель, и побо́рник моля́щих его́ от души́. Те́м же вопие́м ему́, от бе́д изба́вити ны́ при́сно свои́ми мольба́ми, о́тче на́ш, Авва́куме.
 

Песнь 7-я. Ирмос. О те́ле зла́те на́ поли Деи́ре служи́мем трие́ о́троцы не ради́ша о безбо́жнем веле́нии. Но посреди́ Пла́мене вве́ржени, прохлажа́еми поя́ху, благослове́н Бо́г оте́ц на́ших.

Запев. Прему́дрости ча́ша яви́ся доброде́тели испо́лнена, и созва́в пропове́данием высо́каго жития́ своего́ ста́до свое́, и сие́ упра́вил еси́ богому́дре, и с ни́ми о́тче взыва́еши, благослове́н Бо́г оте́ц на́ших.

Запев. В хра́мы та́мо су́щия, в жили́ще че́стно дости́гл еси́, со а́нгелы водворя́яся, и с ни́ми о́тче лику́еши. Те́м же тя́ чтуще преблаже́нне, со дерзнове́нием зове́м, благослове́н Бо́г оте́ц на́ших.

Слава. Блаже́н еси́ и добро́ ти́ е́сть ны́не водвори́вшуся, иде́же пра́ведных во́инства. Иде́же му́ченическая селе́ния. Иде́же прему́дрых апо́стол ли́цы вопию́т, благослове́н Бо́г оте́ц на́ших.

И ныне. Богородичен. Ты́ еди́на Бо́гу вся́ческая му́дростию созда́вшему, Ма́ти позна́ся не искусобра́чная Де́во Пречи́стая. Те́м же Ти́ благоче́стно взыва́юще глаго́лем, благослове́на я́же Бо́га пло́тию ро́ждьши.

Катавасия. Го́споди поми́луй (трижды с поклонами).

Песнь 8-я. Ирмос. В пе́щь о́гненну к де́тем евре́йским соше́дшаго, и пла́мень на хла́д прело́жьшаго Бо́га, по́йте вся́ де́ла Го́спода, и превозноси́те Его́ во́ веки.

Запев. Священноде́йствовав благоче́стно, Христо́ву слу́жбу та́йную, слове́сное овча́ са́м принесе́ся Ему́, же́ртва прия́тна и благоуго́дна, всесверша́ема кро́вию преблаже́нне.

Запев. Свяще́нства оде́жду, де́лы свои́ми прему́дре украси́в, яви́ся целому́дрию ключа́рь. Воздержа́нию пи́ща и́стинная, моли́твы учи́тель, покая́нию наста́вник, и зако́н жи́зни.

Слава. Предложе́нию вре́мя, покая́нию пло́д при́сно предлага́ет, и смоко́вница непло́дная посече́нием прети́т, душе́ моя́ прокля́тия убо́йся, восприими́ же Христа́, благопло́дие доброде́тельно.

И ныне. Богородичен. Не пре́зри Засту́пнице, гла́с ра́б Свои́х и от вся́кия беды и преще́ния лю́таго, Де́во Свята́я все́х исхити́. Прекланя́ет бо богома́терняя моли́тва Твоя́. 

Катавасия. Го́споди поми́луй (трижды с поклонами).

Песнь 9-я. Ирмос. И́же от Бо́га Бо́га Сло́ва, не изрече́нною му́дростию, прише́дшаго обнови́ти Ада́ма, я́дию тле́ния па́дшаго зле́, от святы́я же Деви́цы, неизрече́нно воплоща́ема на́с ра́ди, ве́рнии единому́дрено пе́сньми велича́ем.

Запев с поклоном. Увяди́л еси́ о́тче разли́чныя вра́жия стре́лы, огне́м воздержа́ния, и чистоты́ У́глием плотьску́ю попали́в ти́ну, и́стинней та́мо су́щей све́тлости пресла́вно сподо́бися.

Запев. Светоно́сная твоя́ от́че возсия́вши па́мять, просвеща́ет ду́ши благогове́йно, сию́ сверша́ющих досточу́дне. И прича́стники Бо́жия све́та, явле́но си́х све́ршает. Ю́же досто́йно богому́дре пе́сньми велича́ем.

Слава. Вене́ц нося́ща тя́ о́тче, и по́честь побе́ды прии́мша от Бо́жия десни́цы, и по́двиги сконча́вша. И све́та испо́лньшася Бо́жия, ве́рующе ве́рнии ко Христу́ Моле́бника те́пла тя́ предлага́ем.

И ныне. Богородичен. Я́ко Богоро́дицу Тя́ Деви́це и Ма́терь Сло́ву, Хода́таицу су́щую на́м, присносу́щнаго Бо́жия живота́, и пра́ведное со́лнце возсия́вшую на́м, ве́рнии единому́дрено, пе́сньми велича́ем.

Катавасия. Го́споди поми́луй (трижды с поклонами).

Задостойник. Влады́чице приими́ Моли́тву ра́б Свои́х, и изба́ви на́с от вся́кия ну́жды и печа́ли. Ты́ еси́ Богоро́дице, ору́жие на́ше и стена́. Ты́ еси́ Засту́пнице, и к Тебе́ прибега́ем, Тя́ и ны́не на моли́тву призыва́ем, да изба́виши ны́ от вр́аг на́ших. Возвел́ичим Тя́ вси́ Пренепоро́чную Ма́терь Христа́ Бо́га на́шего, Ю́же осени́ Ду́х Пресвяты́и.

Отпуст: Го́споди Ису́се Христе́, Сы́не Бо́жии, моли́тв ра́ди Пречи́стыя Твоея́ Ма́тере, и свята́го священному́ченика Авва́кума, и все́х ра́ди святы́х, поми́луй и спаси́ На́с, я́ко Бла́г и Человеколю́бец. Ами́нь.

Поделиться: