Канон святым мученикам Феодору юродивому и Луке, мезенским чудотворцам

Главная Публикации Персоналии Канон святым мученикам Феодору юродивому и Луке, мезенским чудотворцам

Темы публикаций

Канон святым мученикам Феодору юродивому и Луке, мезенским чудотворцам

Тропарь, глас 5-и. Испове́даста свята́я ве́ру пра́вую пред мучи́тели, и́же обе́сивше вы́ ве́рвию за вы́я, удави́ша вы́, те́м Христо́с да́ром чюде́с обогати́ вы́, исцеля́ти неду́ги главны́я, любо́вию моля́щимся ва́ма.

Слава, и ныне. Богородичен. Ра́дуися Две́ри Госпо́дня непроходи́мая, ра́дуися Стено́ и Покро́ве прибега́ющим к Тебе́, ра́дуися заве́треннее Приста́нище Неискусобра́чная, ро́ждьшая пло́тию Творца́ Своего́ и Бо́га, моля́щи не пре́зри о воспева́ющих и кла́няющихся Рожеству́ Твоему́ (поклон).

Канон, глас 8-и. Песнь 1-я, ирмос. Во́ду проше́д я́ко по́ суху, из еги́петска зла́ избежа́в, изра́ильтянин вопия́ше: Изба́вителю Бо́гу на́шему пое́м.

Запев с поклоном: Свята́я му́ченика и испове́дника Фео́доре и Луко́, моли́та Бо́га о на́с.

Ра́дуются дне́сь ве́рных собо́ри, соверша́юще па́мять богоно́сною му́ченику, Фео́дора и Луки́ вопию́ще, Изба́вителю Бо́гу на́шему пое́м.

Запев. Да пла́чутся сомохо́тне погиба́ющеи, о́бщницы су́ще уби́йцам святы́х, испове́дника же насле́диста весе́лие ве́чное вопию́ща, Изба́вителю Бо́гу на́шему пое́м.

Слава. Непра́ведно уда́вленная на́ древе свята́я, удави́ста злонача́льнаго змия́, и́же дре́вяным плодо́м дре́вле удави́вшаго прароди́теля ро́да челове́ческаго.

И ныне. Богородичен. Вои́стину ники́и у́м высо́к пости́гнути, ники́и же язы́к сладкоглаго́лив воспе́ти возмо́жет, е́же на Тебе́ бы́вшее та́инство, преесте́ственнаго Рожества́ Богома́ти.

Катавасия: Изба́вита от бе́д рабы́ своя́, свята́я му́ченика Фео́доре и Луко́, я́ко вси́ по́ Бозе к ва́ма прибега́ем, вы́ бо мо́лита за на́с Христа́ Бо́га на́шего (поклон). Го́споди поми́луй (трижды, с поклонами).

Песнь 3-я, ирмос. Небе́сному кру́гу Верхотво́рче Го́споди, и Це́ркви Зижди́телю, Ты́ мене́ утверди́ в любви́ Свое́й, жела́нием сы́и кра́й, и ве́рным Утверже́ние, Еди́не Человеколю́бче.

Запев. Досто́йная ученика́ досто́йнаго священному́ченика Авва́кума, Фео́доре и Луко́, подъя́ста сме́рть я́коже и о́н, за дре́влее благоче́стие, и яви́стася ве́рным утве́ржение.

Запев. Умертви́вша стра́сти грехо́вныя, умертви́ста ко́зни вра́жия, и умерщве́на те́лом блаже́нная, духом взыдо́ста к безсме́ртному Царю́ Сла́вы.

Слава. Ма́л гра́дец Мезе́нь, сла́вою ва́шея кончи́ны ве́лик яви́ся испове́дника, в не́м бо вы прия́ста вене́ц побе́ды, я́ко му́ченика Госпо́дня.

И ныне. Богородичен. Иму́щи дерзнове́ние ко Христу́ Бо́гу на́шему Влады́це, я́ко Ма́ти моли́ Его́ изба́вити ве́рующих в Тя́.

Катавасия: Изба́вита от бе́д рабы́ своя́, свята́я му́ченика Фео́доре и Луко́, я́ко вси́ по́ Бозе к ва́ма прибега́ем, вы́ бо мо́лита за на́с Христа́ Бо́га на́шего (поклон). Го́споди поми́луй (трижды, с поклонами).

Седален, глас 1-и, подобен «Гроб Твой». Ева́нгелия при́сная испо́лнителя, Святы́м Кресто́м просвети́ста омраче́нных, и на́ Небесех обита́юща, ко единосу́щней нераздели́мей Тро́ице и́мата и́стинное дерзнове́ние, му́ченика всечестна́я, моли́та спасти́ душа́ на́ша.

Слава. И ныне. Богородичен. Мно́жество соде́ях зо́л, и трепе́щу Стра́шнаго Суда́, не име́я по́мощи ниотку́ду же Богоро́дице, те́м прибега́ю к Тебе́ еди́ней Засту́пнице, спаси́ мя Свои́м хода́тайством от осужде́ния ве́чнаго, и огня́ гее́ннскаго, и сподо́би досто́йна бы́ти Ца́рствия Сы́на Твоего́, Христа́ Бо́га на́шего.

Песнь 4-я, ирмос. Ты́ ми Христе́ Госпо́дь, Ты́ же и си́ла ми́, Ты́ ми Бо́г, Ты́ ми ра́дование, не оста́вль не́дра О́тча, но ми́лостию Си́ на́шу нищету́ посети́в, те́м с проро́ком Авва́кумом зову́: силе́ Твое́й сла́ва Человеколю́бче.

Запев. Бо́жиею благода́тию укрепля́ема испове́дника, му́жественно претерпе́ста му́ки за и́стинное кре́стное зна́мение, и́мже врага́ ополче́ния устраша́ются.

Запев. Назда́ни на основа́нии апосто́льском и проро́ческом му́ченицы, зда́ние ересе́й разруши́ста, и просла́виста Це́рковь Христо́ву.

Слава. Па́че зарни́ц се́верных облиста́ста страны́ се́вера, иде́же сконча́ста, разгоня́ща тму́ нече́стия безбо́жнаго и вся́каго зла́.

И ныне. Богородичен. Волну́ющееся мо́ре жите́йское, обурева́емо грехи́ мно́гими, безбе́дно преплы́ти помози́ ми Богоро́дице, направля́ющи мя́ в приста́нище Ца́рствия Небе́снаго.

Катавасия: Изба́вита от бе́д рабы́ своя́, свята́я му́ченика Фео́доре и Луко́, я́ко вси́ по́ Бозе к ва́ма прибега́ем, вы́ бо мо́лита за на́с Христа́ Бо́га на́шего (поклон). Го́споди поми́луй (трижды, с поклонами).

Песнь 5-я, ирмос. Вску́ю мя́ отри́ну от лица́ Твоего́ Све́те Незаходя́и, покры́ла мя́ е́сть чужа́я тьма́ окая́ннаго, но обрати́в мя́, и к све́ту заповеде́й Ти́ пути́ моя́ напра́ви, молю́ Ти́ ся.

Запев. Тве́рдо сопроти́вистася веле́нием ерети́к, неи́стово ну́дивших вы́ прия́ти и́х обы́чаи непра́выя, те́м и преда́ша вы́ сме́рти.

Запев. Му́ченическая сме́рть ва́ша пу́ть яви́ся, в Небе́сныи Иеросали́м вы́ приведы́и, в не́м же со святы́ми ликовству́ета при́сно веселя́щася.

Слава. Уя́звленныя бесо́вскими прило́ги душа́ на́ша, исцеля́ются ва́шими моли́твами, му́ченика свята́я, вы́ бо победи́ста вра́жию си́лу кресто́м муче́нии свои́х.

И ныне. Богородичен. Жи́знь произве́дшая ипоста́сную Богороди́тельнице, оживи́ душа́ на́ша умерщве́нныя грехи́ мно́гими, и спаси́ на́с.

Катавасия: Изба́вита от бе́д рабы́ своя́, свята́я му́ченика Фео́доре и Луко́, я́ко вси́ по́ Бозе к ва́ма прибега́ем, вы́ бо мо́лита за на́с Христа́ Бо́га на́шего (поклон). Го́споди поми́луй (трижды, с поклонами).

Песнь 6-я, ирмос. Очи́сти мя́ Спа́се, мно́га бо беззако́ния моя́, и из глубины́ зо́л возведи́ мя́ молю́ся, к Тебе́ бо возва́х и услы́ша мя́, Бо́же спасе́ния моего́.

Запев. Я́коже дре́вле Маккаве́и, прия́ста муче́ния за оте́ческая преда́ния, страстоте́рпца Христо́ва, с ни́ми же торжествую́ща в вы́шних, моли́тася о на́с Го́сподеви.

Запев. Уда́вленная врага́ми дре́вляго благоче́стия, свята́я Фео́доре и Луко́, разреши́та у́зы грехо́в на́ших, моли́твами свои́ми.

Слава. Лю́дие ве́рнии вси́, со иере́и и святи́тели вку́пе, соше́дшеся в це́рковь Бо́жию, просла́вим святу́ю му́ченику Фео́дора и Луку́, да с ни́ми духо́вно весели́мся во́ веки.

И ныне. Богородичен. Свята́я святы́х прообразова́ше Тя́ Богоро́дице, Тобо́ю бо прии́де Архиере́й ве́чных бла́г, и принесе́ Себе́ в Же́ртву за́ люди согре́шьшия, Ея́ же причаща́ющеся, сподобляемся жи́зни ве́чныя.

Катавасия: Изба́вита от бе́д рабы́ своя́, свята́я му́ченика Фео́доре и Луко́, я́ко вси́ по́ Бозе к ва́ма прибега́ем, вы́ бо мо́лита за на́с Христа́ Бо́га на́шего (поклон). Го́споди поми́луй (трижды, без поклонов).

Кондак, глас 3-и, подобен «Девая днесь». Еди́ному Влады́це Христу́ после́доваста неукло́нно, и Его́ ра́ди оста́виста вся́, и прия́ста му́ченическую кончи́ну свята́я испове́дника, и моли́та о на́с Христа́ Преве́чнаго Бо́га.

Икос. Всемогу́щему Тебе́ Бо́гу припа́даю, не сме́я отверсти́ недосто́йных у́ст к славосло́вию святу́ю му́ченику Твое́ю, Фео́дора и Луки́, но оба́че Твое́й благода́ти соде́йствующей ми́, со умиле́нием взыва́ю: богоблаже́нная испове́дника, ве́рная слуга́ Христа́ Бога́, при́сная храни́теля ева́нгельских заповеде́й, пострада́вшая от ру́к беззако́нных, ве́рным еста́ наде́жда кре́пкая, Церкви Святе́й утверже́ние, моли́та о на́с Христа́ преве́чнаго Бо́га.

Песнь 7-я, ирмос. И́же от Июде́и доше́дше о́троцы в Вавило́н дре́вле, ве́рою утверже́нии, пла́мень пе́щныи попра́вше глаго́люще, оте́ц на́ших Бо́же благослове́н еси́.

Запев. Юро́д явля́шеся челове́ком, да утаи́ши от ни́х доброде́тели своя́ Фео́доре, но му́др Бо́гови, Его́же ра́ди терпе́л еси́ вся́ напа́дания от неразу́мных.

Запев. Усма́рь худо́жеством бы́л еси́ Луко́ прече́стне, наставля́я лю́ди ше́ствовати путе́м заповеде́й Бо́жиих, те́м му́ченическаго венца́ сподо́бился еси́.

Слава. Дво́ице му́ченику боже́ственную, дво́ицу естеству́ и еди́но лице́ во Христе́, правосла́вно испове́даста я́вственно кре́стным зна́мением, я́ко ча́да су́ще Це́ркви Бо́жия.

И ныне. Богородичен. Моли́твенница еси́ те́плая ко́ Господу, Хода́таице непрело́жная о на́с гре́шных, Влады́чице Всеми́лостивая, моли́ о на́с Еди́наго Благоутро́бнаго, да спасе́мся.

Катавасия: Изба́вита от бе́д рабы́ своя́, свята́я му́ченика Фео́доре и Луко́, я́ко вси́ по́ Бозе к ва́ма прибега́ем, вы́ бо мо́лита за на́с Христа́ Бо́га на́шего (поклон). Го́споди поми́луй (трижды, с поклонами).

Песнь 8-я, ирмос. Се́дмь седми́цею пе́щь халде́йскии мучи́тель, богочести́вым лю́те разжже́, си́лою же лу́чшею спасе́нных ви́дев, Творцу́ и Изба́вителю вопия́ше: де́ти благослови́те, свяще́ннии воспо́йте лю́дие, и благослови́те Его́ во́ веки.

Запев. Кто́ изочте́т ва́ша по́двиги и чюдеса́, кто́ не удиви́тся ва́шей тве́рдости в ве́ре, ея́же ра́ди пострада́сте, превознося́ще Христа́ во́ веки!

Запев. Еди́ныи прославля́яи святы́я Своя́ Госпо́дь, просла́вил е́сть па́мять святу́ю му́ченику Фео́дора и Луки́, я́ко и инове́рнии моли́твенно чту́т я́.

Слава. На́ Господа упова́ние возложи́вша, небоя́зненно пропове́даста ве́ру христия́нскую, и облича́ста заблужде́ния отсту́пник, и́же удавле́нием умертви́ша вы́.

И ныне. Богородичен. Сохрани́ на́с Богоро́дице от вр́аг ви́димых и неви́димых, да разруша́тся ко́зни и́х, я́же на христия́ны стро́ят су́етно.

Катавасия: Изба́вита от бе́д рабы́ своя́, свята́я му́ченика Фео́доре и Луко́, я́ко вси́ по́ Бозе к ва́ма прибега́ем, вы́ бо мо́лита за на́с Христа́ Бо́га на́шего (поклон). Го́споди поми́луй (трижды, с поклонами).

Песнь 9-я, ирмос. Удиви́ся у́бо о се́м Не́бо, и земли́ ужасо́шася концы́, я́ко Бо́г яви́ся челове́ком пло́тию, чре́во же Твое́ бы́сть простра́ннее Небе́с, те́м Тя́ Богоро́дице а́нгел и челове́к чинонача́лия велича́ем.

Запев (с поклоном). Я́ко две́ свети́ле поста́ви вы́ Госпо́дь на́ небеси церко́внем, да просвеща́ета и согрева́ета зе́млю ду́ш на́ших, приноси́ти плоды́ спасе́нныя.

Запев. Испове́дника непобеди́мая, утверди́та при́сно пребыва́ти в ве́ре и́стинней, и изба́вита от напра́сныя сме́рти, и му́ки ве́чныя, все́х ве́рою моля́щихся ва́ма.

Слава. Венцы́ му́ченическими досто́йно укра́шена свята́я, приими́та от на́с сплете́нныи си́ми ма́лыми и худы́ми пе́сньми вене́ц похвалы́, да и мы́ Небе́сных венце́в сподо́бимся.

И ныне. Богородичен. Отжени́ от на́с печа́ль, истреби́вшая печа́ль пра́матери Е́ввы, и испо́лни на́с ра́дости боже́ственныя, прии́мшая от А́нгела ра́дость, Богоотрокови́це Мари́е.

Катавасия: Изба́вита от бе́д рабы́ своя́, свята́я му́ченика Фео́доре и Луко́, я́ко вси́ по́ Бозе к ва́ма прибега́ем, вы́ бо мо́лита за на́с Христа́ Бо́га на́шего (поклон). Го́споди поми́луй (трижды, с поклонами).

Отпуст: Го́споди Исус́е Христе́ Сы́не Бо́жии, моли́тв ра́ди Пречи́стыя Ти́ Ма́тере, и святу́ю му́ченику Фео́дора, и́же Тебе́ ра́ди уро́диваго, и Луки́, и все́х святы́х, поми́луй и спаси́ на́с, я́ко Бла́г и Человеколю́бец. Ами́нь.