Канон преподобному Серапиону Черемшанскому

Главная Публикации Персоналии Канон преподобному Серапиону Черемшанскому

Темы публикаций

Канон преподобному Серапиону Черемшанскому

Тропарь преподобному, глас 1-и, подобен «В рожестве девство…». И́же на земли́ а́нгел, и небе́сныи челове́к, и пра́вило доброде́телей Серапио́не прему́дре, любо́вию взы́де ко И́стинному Животу́, и моли́твами твои́ми избавля́й от сме́рти душа́ на́ша.

Канон, глас 2-и, имея краегранесие: «Серапиона восхвалю святаго».

Песнь 1-я, ирмос.Глубине́ откры́л е́сть дно́, и по́ суху свои́х изво́дит, в ней погру́жь сопроти́вныя, кре́пкии во бране́х Госпо́дь, я́ко просла́вися.

Запев: Преподо́бне о́тче Серапио́не, моли́ Бо́га о на́с.

Сло́во пода́ждь ми́ Го́споди, воспе́ти дерза́ющу, Серапио́на преподо́бнаго, черемша́нскаго свети́льника, при́сно па́мятнаго.

Запев. Ева́нгельскому гла́су повину́яся, отве́ржеся себе́ вои́стину, Христа́ Влады́ки ра́ди, и взе́м кре́ст своего́ по́двига, восле́д Того́ теча́ше.

Слава. Родитель дом оставль, и знаемых, от юности преподобне, и пустынныя обители прехождаше, и ангелолепнаго ради жития твоего, сподобися и образу ангельскому.

И ныне. Богородичен. А́ще и Бо́га пло́тию, породи́вши Богоотрокови́це, но Де́вою пребыла́ еси́: О́! пресла́вному чюдеси́, е́же о Тебе́ Преблагослове́нная.

Катавасия: Изба́ви от бе́д рабы́ своя́, преподо́бне о́тче и испове́дниче Серапио́не, я́ко вси́ по́ Бозе к тебе́ прибега́ем, ты́ бо мо́лиши о на́с Христа́ Бо́га на́шего (поклон).

Го́споди поми́луй (трижды, с поклонами).

Песнь 3-я, ирмос. Процвела́ е́сть пусты́ня я́ко кри́н Го́споди, язы́чная неплодя́щая це́ркви, прише́ствием Ти́, о не́й же утверди́ся се́рдце мое́.

Запев. Процве́л еси́ я́ко кри́н благоуха́нен, и я́ко фи́ник давы́дски о́тче, и стори́чен пло́д принесе́ Влады́це, о Не́м же утверди́ся се́рдце твое́.

Запев. Изра́иля Но́ваго пасы́и Госпо́дь, избра́ тебе́ о́тче ди́вныи, и па́стыря поставля́ет тя́, и́ноким сердца́ утвержа́я.

Слава.О́ страсе гоне́ния небре́г Серапио́не, прии́де па́ки в преде́лы руси́йския, и обре́те ме́сто при исхо́дищих во́д, иде́же утверди́ свое́ жи́тельство.

И ныне. Богородичен. Нетле́нно и несказа́нно Го́спода поро́ждьши, ра́дуися Ма́ти Всепе́тая, и сподо́би нетле́нныя ра́дости, и́же при́сно Тебе́ воспева́ющыя.

Катавасия: Изба́ви от бе́д рабы́ своя́, преподо́бне о́тче и испове́дниче Серапио́не, я́ко вси́ по́ Бозе к тебе́ прибега́ем, ты́ бо мо́лиши о на́с Христа́ Бо́га на́шего (поклон).

Го́споди поми́луй (трижды, с поклонами).

Седален, глас 4-и, подобен «Скоро предвари». Свети́льниче пресве́тлыи и́стины Христо́вы, ве́ру небла́зненую до конца́ соблюде́ о́тче богоглаго́ливе, отве́рг е́реси злове́рных ху́льник, и погаси́ пла́мень плотьски́х страсте́й, те́м я́ко уго́дник Христо́в все́х просвеща́еши.

Слава, и ныне. Богородичен. Дево Всенепоро́чная, Пребога́таго Бо́га поро́ждьши, со безпло́тными Того́ непреста́нно моли́, оставле́ние прегреше́нии и исправле́ние жития́ да́ти на́м пре́же конца́, ве́рою и любо́вию пою́щим Тя́ по́ долгу, Еди́на Многопе́тая.

Песнь 4-я, ирмос. Прише́ствовав от Де́вы не хода́тай ни а́нгел, но Ты́ Са́м Го́споди вопло́щься, и спасе́ всего́ мя челове́ка, те́м вопию́ Ти́: сла́ва си́ле Твое́й!

Запев. А́гнца Бо́жия, ми́ру грехи́ взе́млющаго, подража́я незло́бию, ми́лостию и всепроще́нием при́сным, о́тче Серапио́не, и ми́лости Того́ сподо́бися.

Запев.  Возлета́я вы́ну бе́яше умо́м очище́ном, ко Престо́лу Вы́шняго, равноа́нгельне Серапио́не, те́мже ны́не на́ Небесех, со а́нгелы предстои́ши Тому́.

Слава. Огне́м любве́ твоея́ ко́ Господу, попали́л еси́ те́рние грехо́вное, плодоно́сну ду́шу свою́ содела́в, те́мже стори́чен пло́д доброде́телей, Влады́це прине́сл еси́.

И ныне. Богородичен. Сове́том Отца́ Безнача́льнаго, соде́йствием же Пресвята́го Ду́ха, Безле́тнаго Сы́на зачала́ еси́, и породи́ Пресла́вная Де́во, И́же в Поро́ду на́м вхо́д отве́рзшаго.

Катавасия: Изба́ви от бе́д рабы́ своя́, преподо́бне о́тче и испове́дниче Серапио́не, я́ко вси́ по́ Бозе к тебе́ прибега́ем, ты́ бо мо́лиши о на́с Христа́ Бо́га на́шего (поклон).

Го́споди поми́луй (трижды, с поклонами).

Песнь 5-я, ирмос. Просвеще́ние во тьме́ лежа́щим, и спасе́ние ненача́емым, Христе́ Спа́се мо́й, к Тебе́ у́тренюю, Царю́ ми́рныи, просвети́ мя сия́нием Си́, ино́го бо ра́зве Тебе́ Бо́га не зна́ем.

Запев. Христо́ва светоли́тия озаре́нию, яви́лся еси́ Серапио́не прича́стник, моли́твою и чистото́ю, и вседне́вным стра́шных Та́ин служе́нием, те́мже во́ свете непристу́пне всели́лся еси́.

Запев. Всено́щными при́сно бде́нии, и труды́ преподо́бне мно́гими, ми́лостынею же непреста́нною Серапио́не, и боже́ственных уче́нии сказа́нием, ди́вен уго́дник Бо́жии яви́лся еси́.

Слава. Арка́дии свяще́нныи испове́дник, Генна́дии же и Ко́нон ди́вная страда́льца, живи́и му́ченицы Су́ждальстии, мо́щи дре́вних му́ченик полага́ху, освяща́юще созда́нную тобо́ю о́тче це́рковь.

И ныне. Богородичен. Ложесны́ несказа́нно вмести́ла еси́, Невмести́маго Зижди́теля все́й тва́ри, и млеко́м Деви́ческим воспите́ла еси́, Пита́ющаго всю́ подсо́лнечную. О! преесте́ственнаго та́инства, е́же о Тебе́ Богоневе́сто.

Катавасия: Изба́ви от бе́д рабы́ своя́, преподо́бне о́тче и испове́дниче Серапио́не, я́ко вси́ по́ Бозе к тебе́ прибега́ем, ты́ бо мо́лиши о на́с Христа́ Бо́га на́шего (поклон).

Го́споди поми́луй (трижды, с поклонами).

Песнь 6-я, ирмос. В бе́здне грехо́вней одержи́м, неизсле́дную милосе́рдия Твоего́ призыва́ю бе́здну: от тли́ Бо́же мя́ возведи́.

Запев.Ю́ным наказа́телю прему́дрыи, мене́ ра́зумом младе́нствующа, наста́ви на стези́ доброде́тельныя, о́тче Серапио́не.

Запев. Свети́льнику пресве́тлому, рече́ся под спу́дом не кры́тися, и прояви́ Серапио́не Госпо́дь, мо́щи твоя́ нетле́нныя.

Слава. Вся́кой ми́ зло́бе прича́стнику, да́руй твои́ми о́тче моли́твами, гре́х мои́х оша́ятися, и причасти́тися нетле́нныя пи́щи.

И ныне. Богородичен. Язы́ком недосто́йным, ка́ко Тя́ воспе́ти дерза́ю, Ю́же ублажа́ют вси́ ро́ди, я́коже прорекла́ еси́.

Катавасия: Изба́ви от бе́д рабы́ своя́, преподо́бне о́тче и испове́дниче Серапио́не, я́ко вси́ по́ Бозе к тебе́ прибега́ем, ты́ бо мо́лиши о на́с Христа́ Бо́га на́шего (поклон).

Го́споди поми́луй (трижды, без поклонов).

Кондак, глас 4-и, подобен «Вознесы́ися на́ Крест».После́довав Распе́ньшемуся во́лею, вся́ я́же в ми́ре кра́сная оста́вил еси́, еди́ныя красоты́ Христо́вы возжеле́в, и ны́не на́ Небесех наслажда́яся Того́ добро́ты, дерзнове́ние име́я к Нему́, ми́р вселе́нней испроси́, и все́м христия́ном ве́лию ми́лость.

Икос. Все́ естество́ свое́ повину́в Бо́гови, и любо́вию Того́ распали́вся, и я́ко и́скра востече́ на́ Небо, преподо́бне Серапио́не прему́дре, иде́же во́ свете непристу́пнем, чи́сте зри́ши Святу́ю Тро́ицу, дерзнове́ние ве́лие имы́и, ми́р вселе́нней испроси́, и все́м христия́ном ве́лию ми́лость.

Песнь 7-я, ирмос. Ю́ноши ве́рныя, в пе́щь о́гненную вле́зша, шумя́щ Ду́х хла́ден, невреди́мы сохрани́, и Бо́жия А́нгела схожде́ние, те́мже в пла́мени прохлажда́еми, благода́рственно поя́ху, препе́тыи отце́м Госпо́дь и Бо́г, благослове́н еси́.

Запев.Темни́чное томле́ние, я́ко ча́шу ме́двену, испи́л еси́ преподо́бне, укрепля́ем в терпе́нии, И́же пе́щь о́гненную прохла́ждьшим, де́тем благода́рственно пою́щим: препе́тыи отце́м Госпо́дь и Бо́г, благослове́н еси́.

Запев.А́ще у́бо теле́сне, иногда́ затвори́ся в темни́це, страда́льче Серапио́не, оба́че ду́хом свобо́дным, непреста́нно прославля́ше Соде́теля, о́трочески зовы́и: препе́тыи отце́м Госпо́дь и Бо́г, благослове́н еси́.

Слава. Госпо́дним Серапио́не страсте́м, во́лею яви́ся прича́стник, те́мже и темни́ца твоя́, во све́тлую це́рковь претвори́ся, иде́же со мно́жеством ве́рных, просла́ви Христа́ воскре́сшаго: препе́тыи отце́м Госпо́дь и Бо́г, благослове́н еси́.

И ныне. Богородичен. Окорми́тельница ми́ бу́ди, ко приста́нищу заве́треннему, Ма́ти Ису́сова, И́же бу́ри и ве́тры, в тишину́ ма́нием прелага́ющаго, да пою́ непреста́нно зовы́и: препе́тыи отце́м Госпо́дь и Бо́г, благослове́н еси́.

Катавасия: Изба́ви от бе́д рабы́ своя́, преподо́бне о́тче и испове́дниче Серапио́не, я́ко вси́ по́ Бозе к тебе́ прибега́ем, ты́ бо мо́лиши о на́с Христа́ Бо́га на́шего (поклон).

Го́споди поми́луй (трижды, с поклонами).

Песнь 8-я, ирмос. Та́йну пресла́вну вавило́нская показа́ пе́щь, исто́чшая хла́д, я́ко струя́ хотя́ше невеще́ственныи О́гнь прия́ти, Иорда́н стерпе́ти пло́тию крести́ма Зижди́теля, Его́ же благословя́т лю́дие, и превозно́сят во вся́ ве́ки.

Запев. Ми́лости исто́чник показа́ся неизсяка́емыи Серапио́не, утеша́я скорбя́щыя, больны́х посеща́я, снабдева́я же ни́щия, и уподо́бился еси́ Соде́телю, Его́же благосло́вят лю́дие, и превозно́сят во вся́ ве́ки.

Запев. Да́ром чуде́с обогати́ся пресла́вно, честны́и гро́б тво́й преподо́бне, и источа́ет исцеле́ния, водны́и при не́м исто́чник, приходя́щим с ве́рою, моли́ о чту́щих тя́ Го́спода, Его́же благосло́вят лю́дие, и превозно́сят во вся́ ве́ки.

Слава. Врача́ тя душа́м преизя́щна, и заблу́ждьшим наста́вника, моле́бника Христо́ва непреста́ннаго, и соверши́теля Того́ та́йнам, и адама́нта ве́ры, яви́ тя ́Госпо́дь Серапио́не, Его́же благосло́вят лю́дие, и превозно́сят во вся́ ве́ки.

И ныне. Богородичен. Искони́ несве́домое та́инство, Тобо́ю прия́т соверше́ние, Де́во небла́зненная, Безле́тныи бо и Безпло́тныи, пло́ть в ле́то от Тебе́ прия́т, Сы́н Бо́жии Сы́н челове́чь бы́сть, Его́же благосло́вят лю́дие, и превозно́сят во вся́ ве́ки.

Катавасия: Изба́ви от бе́д рабы́ своя́, преподо́бне о́тче и испове́дниче Серапио́не, я́ко вси́ по́ Бозе к тебе́ прибега́ем, ты́ бо мо́лиши о на́с Христа́ Бо́га на́шего (поклон).

Го́споди поми́луй (трижды, с поклонами).

Песнь 9-я, ирмос. Недоуме́ет вся́к язы́к хвали́ти Тя́ досто́йно, низуме́ет же у́м преми́рныи пе́ти Тя́ Богоро́дице, оба́че Блага́ су́щи ве́ру приими́, и́бо любо́вь ве́си боже́ственную на́шу, Ты́ бо христия́ном еси́ Предста́тельница, и Тебе́ велича́ем.

Запев (с поклоном). Еди́ныя вы́шния ра́дости, от ю́ности возжеле́в блаже́нне, вся́каго мирска́го наслажде́ния, оша́ятися себе́ пону́ди, и́нок бы́сть и́стинен, и и́нокующим оте́ц яви́ся, и предста́тель за чту́щыя тя́.

Запев. Ри́зы твоя́ душе́вныя Серапио́не, па́че сне́га убеле́ны яви́шася, чистото́ю жития́ твоего́, посто́м же и непреста́нною моли́твою, и любовию нерастленною, сего ради сподобися отче предивныи, и чертога Небеснаго.

Слава. Е́же от скверна́вых и недосто́йных усте́н, принесе́ннаго ти́ сего́ моле́ния, не пре́зри свяще́нныи о́тче, по ми́лости же твое́й некра́сную пе́снь, приими́ от мене́ гре́шнаго, и моли́ся ко Отцу́ Всеми́лостивому, пода́ти и мне́ грехо́м проще́ние.

И ныне. Богородичен. Ио́сифова зако́нная Обру́ченице, Ты́ па́че сло́ва и по́мысла, Неве́ста яви́ся Вы́шняго, и Сло́ва вмести́лище Бо́жия, На́нь же серафи́ми зре́ти не сме́ют, и на руку́ несказа́нно поноси́ла еси́, вы́ну носи́маго херуви́мы.

Катавасия: Изба́ви от бе́д рабы́ своя́, преподо́бне о́тче и испове́дниче Серапио́не, я́ко вси́ по́ Бозе к тебе́ прибега́ем, ты́ бо мо́лиши о на́с Христа́ Бо́га на́шего (поклон).

Го́споди поми́луй (трижды, с поклонами).

Отпу́ст: Го́споди Ису́се Христе́ Сы́не Бо́жии, мо́литв ра́ди Пречи́стыя Твоея́ Ма́тере, и преподо́бнаго и богоно́снаго отца́ на́шего и испове́дника Серапио́на, архи́мандрита Черемша́нскаго, но́ваго чудотво́рца, и все́х святы́х, поми́луй и спаси́ на́с, я́ко Бла́г и Человеколю́бец. Ами́нь.