Главная Публикации Персоналии Канон иже во святых отцу нашему Иосифу, епископу Дальневосточному

Темы публикаций

Канон иже во святых отцу нашему Иосифу, епископу Дальневосточному

Тропарь, глас 4-и. От присносветя́щаго Огня́ благода́ть прии́м, я́ко свети́льник на све́щнице неугаси́мо сия́я, восто́чныя страны́ све́том доброде́телей твои́х озари́л еси́, и лю́ди стезе́ю пра́вою ходи́ти научи́л еси́, и до́бре вда́нныи ти́ тала́нт умно́жив, вни́де в ра́дость Го́спода своего́, о́тче на́ш святи́телю Ио́сифе, моли́ Христа́ Бо́га спасти́ся душа́м на́шим.

Слава, и ныне. Богородичен. И́же о́т века утае́нное, и а́нгелом несве́домое та́инство, Тобо́ю Богоро́дице земны́м яви́ся Бо́г, в неразме́сне снятии воплоща́ем, и Кре́ст во́лею на́с ра́ди восприи́м, имже воскреси́в первозда́ннаго, и спасе́ от сме́рти душа́ на́ша.

Канон, глас 5-й. Песнь 1-я, ирмо́с. Пе́снь побе́дную принесе́м лю́дие, изба́вльшему Бо́гу, из рабо́ты Моисе́ом лю́ди, сла́вно бо просла́вися.

Запев: Святи́телю Христо́в Ио́сифе, моли́ Бо́га о на́с (поклон).
Во святи́телех изря́днаго, пе́сньми похва́лим, его́же освяти́ на спасе́ние лю́дем Свои́м, И́же во́ веки ца́рствуяи Христо́с Бо́г, сла́вно бо просла́вися
.

Запев. Восходя́и на херуви́мех, и пасы́и Изра́иля, наставля́я яко овча́ Ио́сифа, твоея́ души́ узре́в благо́е произволе́ние, ко спасе́ния стези́ тя наставля́ет, сла́вно бо просла́вися.

Запев. Па́че все́х кра́сных ми́ра сего́, от ю́ности возлюби́в Го́спода, Тому́ во умиле́нии души́ о спасе́нии моля́шеся, те́мже по премно́гу возлюби́л тя е́сть, и преди́вна тя в ми́ре показа́, сла́вно бо просла́вися.

Слава. Изведы́и я́ко све́т пра́вду твою́, и судьбы́ Твоя́ я́ко полу́дне, да изба́вит и на́с от уны́ния тьмы́, и рабо́ты греха́, Светода́тель Христо́с, сла́вно бо просла́вися.

И ныне. Богородичен. Озари́ на́ш ра́зум Пречи́стая, луче́ю Бо́жия сла́вы ве́чныя, Я́же Со́лнца пра́вды ми́рови ро́ждьшая, зе́млю бо и лю́ди осия́в, све́том Воскресе́ния вся́ просвети́, сла́вно бо просла́вися.

Катавасия: Изба́ви от бе́д рабы́ своя́, святи́телю Христо́в Ио́сифе, я́ко вси́ по́ Бозе к тебе́ прибега́ем, ты́ бо мо́лиши о на́с Христа́ Бо́га на́шего (поклон). Го́споди помил́уй (трижды, с поклонами).

Песнь 3-я, ирмо́с. Утверже́и ни на че́м же зе́млю повеле́нием Си́, и распространи́в неодержи́мую тяготу́, на недви́жимом Христе́ ка́мени заповеде́й Ти́, Це́рковь Свою́ утверди́, Еди́не Бла́же и Человеколю́бче.

Запев. Угото́ва се́рдце свое́ упова́ти на́ Господа, утверди́вся апо́стольскими повеле́ньми, и ны́не дости́гл еси́ гра́да Бо́га Жи́ва, сочета́вся перворо́дных собо́ру, его́же сподо́бити и на́с моли́ся, свя́те Ио́сифе.

Запев. Строи́телю прему́дре та́ин Христо́вых, ве́рных я́ко ка́мение жи́во созида́ше, в хра́м духо́вен, святи́тельство свя́то, возноси́ти же́ртву Бо́гови, жи́ву и благоприя́тну, лю́бовь и пра́вду и целому́дрие.

Слава. С супру́жницею до́брою по́ плоти разлучи́вшася, и о́ба и́ноческим лико́м вожделе́нно сочета́стася, да Бо́гови Еди́ному во́ веки живете́, ны́не же мзду́ воздержа́ния на́ небесех прие́мша, моли́тася и на́м по всему́ непоро́чным бы́ти.

И ныне. Богородичен. Боже́ственнаго Гаврии́ла чинонача́льника иму́ще, благогове́йно е́же ра́дуися, ве́рою приво́дим согла́сно, неискусобра́чней Ма́тери Богоро́дице ве́рно, Ею́же бе́д и скорбе́й, и неду́г избавля́емся.

Катавасия. Го́споди помил́уй (трижды, с поклонами).

Седален, глас 1-й, подобен «Лик ангельскии». Лик святи́телей, престо́лу Бо́жию на́ Небесех предстоя́щих, бра́та любе́знаго Афана́сия прие́м возвесели́ся, о не́мже и мы́ и́же на земли́ су́ще хвалу́ возсыла́ем, от́ мрака бо неве́дения и пре́лести, но́выя лю́ди Всецарю́ Христу́, ева́нгельским сло́вом приведе́.

Слава, и ныне. Богородичен. Упова́ние христия́ном Пресвята́я Де́во, Его́же родила́ еси́ Бо́га, па́че ума́ и сло́ва, непреста́нно моли́ со апо́столы и святи́тели, да́ти оставле́ние грехо́м на́шим все́м, и исправле́ние житию́, ве́рою и любо́вию при́сно Тя сла́вящим.

Песнь 4-я, ирмо́с. Боже́ственное Твое́ разуме́в смотре́ние, дивя́ся Авва́кум Христе́ тре́петно вопия́ше Ти́, на спасе́ние лю́дем Си́, спасти́ благи́я Своя́ прише́л еси́.

Запев. Тле́нныя любве́ оста́вль сопряже́ние, име́ние все́ избра́нней Неве́сте, Це́ркви Святе́й прине́сл еси́, на спасе́ние лю́дем Христо́вым, свяще́нную оби́тель воздви́гл еси́.

Запев. Христо́во смире́ние возлюби́в, по́стническому житию́ усе́рдием себе́ вдаде́, сла́вы вся́кия ми́ра сего́ убега́я, нетле́нней сла́ве сподо́бился еси́.

Слава. Боже́ственную слу́жбу со́ страхом соверша́я, Небе́сным Хле́бом Христо́вы лю́ди препита́л еси́, и́хже и Воскресе́нию Его́ прича́стники покажи́, и бу́дущаго ве́ка жи́зни несконча́емей.

И ныне. Богородичен. Нетле́нна ца́рства восия́ла еси́ ски́петро, от ко́рене Иессе́ова, и ражда́еши Отроча́ безму́жно Чи́стая, Ада́мова и Давы́дова Бо́га, вку́пе и Зижди́теля и Го́спода.

Катавасия. Го́споди поми́луй (трижды, с поклонами).

Песнь 5-я, ирмо́с. Окая́нную ду́шу мою́, бори́мую тмо́ю страсте́й, предвари́в уще́дри, и восия́й Мы́сленное Со́лнце, дне́ светя́щия лучи́ во мне́, да озари́т мя́ в нощи́ Све́т.

Запев. О́т нощи у́тренюя ду́х тво́й, мы́сленному Со́лнцу Христу́ внима́ше, зане́ све́т живо́тныи повеле́ния Его́, и́хже луча́ми и лю́ди своя́ просвети́л еси́, из тмы́ грехо́вныя изводя́, и ча́да Све́ту сотворя́я их.

Запев. Бо́г ми́ра воздви́гии тя́, в па́стыря овца́м святи́телю, кро́вию Заве́та Ве́чнаго, благода́тию Сы́на Своего́, соверши́л тя́ е́сть в бога́тстве де́л благи́х, и́хже ревни́телем и на́м ча́дом твои́м бы́ти помоли́ся.

Запев. Забы́вшим о́браз Бо́жии, и не творя́щим и́стины, Ио́сиф святи́тель о́т нощи вопие́т, воста́ни спя́и, и воскресни́ от ме́ртвых, и освети́т тя Христо́с, росо́ю ми́лости исцеля́я тя́.

Слава. Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны, а́ще и в те́мных страсте́х бори́ми, и па́че все́х окая́ннии бы́хом, но ра́зве Тебе́ ино́го не зна́ем, моли́твами апо́стол и му́ченик Твои́х, да́руй на́м покая́ния све́т.

И ныне. Богородичен. Воста́ни душе́ моя́, воста́ни ра́но, псалты́рь Давы́дов взе́м укрепи́ся, Богоневе́сту Мари́ю, преми́рною любо́вию блиста́ющу воспо́й, да лучу́ утеше́ния от Нея́ прии́меши.

Катавасия. Го́споди помил́уй (трижды, с поклонами).

Песнь 6-я, ирмо́с. Я́коже проро́ка от зве́ря изба́вил еси́ Го́споди, и мене́ из глубины́ беззако́нных страсте́й, возведи́ молю́ся, да приложу призре́ти ми, к це́ркви святе́й Твое́й.

Запев. Егда́ нече́стия во́лны бу́рею возшуме́ша, и уста́ поги́бельныя на святу́ю ве́ру отверзо́шася, изба́вил тя́ е́сть Госпо́дь, от ру́к жа́ждущих неви́нныя кро́ве, умно́жив дни́ твоя́ на земли́, во сла́ву Це́ркви Святе́й.

Запев. Потопля́ему беззако́ния бу́рею, кораблю́ церко́вному, не́ дал еси погрузи́тися, но и ны́не из ле́ности мно́гия, и уны́ния глубины́, возведи́ ча́да своя́ о́тче на́ш Ио́сифе.

Слава. Возопи́х в печа́ли к до́брому па́стырю, о́тче Ио́сифе, изба́ви от бе́здны обыше́дшия мя́; Спа́се Преблаги́и, моли́твами святи́теля Твоего́, спаси́ мя́ Всеми́лостиве.

И ныне. Богородичен. Недоуме́ние одержи́т мя́, не све́м бо в себе́ никоего́же добра́, но всего́ себе́ малоду́шна и стра́стна, и ска́редна и уны́ла. О́, ка́ко прейду́ жития́ сего́ пу́ть. А́ще не Ты́ Богома́ти, бо́дренною Си́ моли́твою укрепи́ши.

Катавасия. Го́споди помил́уй (трижды, без поклонов). Слава, и ныне.

Кондак, глас 2-и, подобен «Явился еси днесь». Яви́лся еси́ ми́рови святи́тель и́стинен Ио́сифе, печа́тию Животворя́щаго Ду́ха зна́менуя лю́ди своя́, да не прико́снется и́м супоста́т, но да соблюде́ши их в жи́знь боже́ственную и нетле́нную.

Икос. Восто́чным страна́м, об о́н по́л Байка́ла сла́внаго е́зера лежа́щим, и брега́м Аму́рския реки́, и земли́ вскра́й окия́нскаго мо́ря вели́каго, па́стырь до́брыи яви́ся, о́тче богому́дре Ио́сифе, любо́вными словесы́ созыва́я о́вцы расточе́нныя, из пусты́нь и стремни́н на ра́мо взе́м износя́, избра́нному ста́ду Спа́са Христа́ сочета́я, и от зла́ка Его́ пречи́стых и животворя́щих Та́ин пита́я, и соблюда́я их в жи́знь боже́ственную и нетле́нную.

Песнь 7-я, ирмо́с. Пла́мень пе́щныи порабо́тиша благочести́вии о́троцы, те́м свы́ше оброси́ я́, гото́вы пали́мы по естеству́, но па́че естества́ му́жески поя́ху, благослове́н еси́ Го́споди, на престо́ле сла́вы Ца́рствия Твоего́.

Запев. Пре́дал еси́ нас в ру́ки вра́г безза́конных, разори́л я́же на земли́ святы́ню Твою́, но покая́нием на́с обнови́, и зе́млю сожже́нную ми́лостию Си́ ороси́, святи́тель с ве́рою взыва́ше, Бо́же оте́ц на́ших, прехва́льныи во́ веки.

Запев. Во изгна́нии на чу́ждей земли́ пребыва́я, я́ко о́троцы дре́вле о Сио́не пе́снь плаче́вную пою́ще, сле́зы же ра́достию растворя́ше, ду́хом бу́дущая прозира́я, я́ко па́ки ве́рою пра́вою Руси́я восия́ет, и еди́неми усты́ просла́вим Бо́га оте́ц на́ших.

Слава. Го́споду тя́ от земли́ призыва́ющу, по мно́гих труде́х ра́достныи поко́й прия́ти, ча́дом благо́е насле́дие оста́вль, во сла́ву верхо́вных апо́стол Спа́совых, хра́м всече́стне воздви́же, и́хже уче́ньми сохраня́еми, ку́пно с тобо́ю дости́гнем Ца́рьствия Его́.

И ныне. Богородичен. О́, Це́ркви Сио́нская, возжеле́нная о́т века. Воста́ни, отложи́ се́тование свое́, се́ Жени́х тво́й приближа́ется Христо́с, в добро́ту па́че со́лнечныя тя́ облека́я, и неизрече́нныя сла́вы да́ры да́руя, во блаже́ннем Ца́рствии Его́.

Катавасия. Го́споди помил́уй (трижды, с поклонами).

Песнь 8-я, ирмо́с. Из Отца́ пре́жде ве́к рожде́ннаго Сы́на и Бо́га, и в после́дняя ле́та, воплоще́на от Де́вы Ма́тере, свяще́ннии по́йте, лю́дие превозноси́те Его́ во́ веки.

Запев. В де́нь всера́достныи е́же по́ плоти Спа́сова Рожества́, ча́шу Госпо́дню возне́сл еси́, ослабе́вшима ста́ростию дла́ньма, па́че же сего́ ны́не, в ве́чней сла́ве и си́ле, Го́спода превозно́сиши и сла́виши во́ веки.

Запев. Душа́ твоя́ е́же на земли́ ме́ртвеное те́ло оста́вльши, и ко престо́лу Небе́сному веселя́щися взы́де, иде́же пра́ведных ли́цы, апо́стол и му́ченик собо́ри, хва́лят и воспева́ют Го́спода во́ веки.

Запев. Благослове́н еси́ Ио́сифе, му́жу жела́нии Госпо́дних, бога́тство бо духо́вное, убо́гим расточи́л еси́, те́м же и Све́т тебе́ дне́сь Невече́рнии сияет, и пра́вда твоя́ пребыва́ет во́ веки.

Слава. Троичен. О́, преми́рная Держа́во! О́, Вели́чество непости́жимое, благода́ти Исто́чниче, и душа́м спаси́тельное Промышле́ние, Всесвята́я Тро́ице, бу́ди благослове́на от на́с, и сла́вима во́ веки!

И ныне. Богородичен. Украшена́ добро́тою чистоты́ Де́во Ма́ти, добротво́рнаго благоле́пия Жили́ще бы́вши, те́мже Тя́ пое́м и превозно́сим Чи́стую во́ веки.

Катавасия. Го́споди помил́уй (трижды, с поклонами).

Песнь 9-я, ирмо́с. Иса́ие лику́й, Де́вая бо име́ во́ чреве, и породи́ Сы́на Емману́ила, Бо́га же и Челове́ка, Восто́к И́мя Ему́, Его́ же велича́юще, Тебе́ Де́во ублажа́ем.

Запев (с поклоном). Вене́ц похва́льныи прино́сим ти́, де́лателю благи́и Ио́сифе, плоды́ бо трудо́в твои́х, душа́ пита́ют пи́щею безсме́ртия, сего́ ра́ди лю́дие спаса́емии, Спа́са и Влады́ку велича́ем.

Запев. Содержи́т дне́сь и во́ веки Це́ркви, апо́стол честна́я повеле́ния, и гла́сы их свяще́нными крася́щися вопие́т, яви́ся благода́ть Бо́жия, все́м челове́ком спаси́тельная, е́й же ты́ святи́телю, мно́ги прича́стники приве́л еси́.

Слава. Благослови́ Руси́е благослове́ннаго от сыно́в твои́х, его́же во отца́ спаса́емым, избра́ все́х благи́х Пода́тель, ви́дящи его́ я́ко звезду́ зау́тренюю на Восто́це восходя́ща, и све́тлостию добро́ты своея́ дале́че осия́юща.

И ныне. Богородичен. Светоно́сная Колесни́ца Со́лнца яви́лася еси́ вои́стину, восия́вшаго от Твои́х пречи́стых ложе́сн, и разруши́вшаго пре́лести тму́ лю́тую, те́мже по́ долгу Тя́ ве́рою ублажа́ем.

Отпу́ст. Го́споди Ису́се Христе́, Сы́не Бо́жии, моли́тв ра́ди Пречи́стыя Ти́ Ма́тере, и и́же во святы́х отца́ на́шего Ио́сифа, епи́скопа Дальневосто́чнаго, и все́х святы́х, поми́луй и спаси́ нас, я́ко Бла́г и Человеколю́бец. Ами́нь.