Главная Публикации Персоналии Канон святому священномученику Даниилу, протопопу Костромскому

Темы публикаций

Канон святому священномученику Даниилу, протопопу Костромскому

Тропарь, глаc 3-и. Богодухнове́нною любо́вию и ве́рою, и неoбори́мою му́дростию и терпе́нием, победи́л еси́ проти́вныя, священному́чениче Дании́ле, и яви́лся еси́ сто́лп непоколеби́м Це́ркви Христо́вой, и мо́лишися о на́с, и́же твою́ святу́ю па́мять почита́ющих.

Слава, и ныне. Богородичен. Тебе́ Ходáтаицу спасéния ро́да нáшего, воспевáем Богоро́дице Де́во, пло́тию бо ею́же из Тебе́ прошéд Сы́н Тво́й и Бо́г нáш, кре́стную приéм стрáсть, избáвил е́сть нáс из истле́ния, я́ко Человеколю́бец.

Канон священномученику, глас 8-и. Песнь 1-я, ирмо́с. Поéм Го́сподеви, провéдшему лю́ди своя́, сквозе́ Чермно́е мо́ре, я́ко Еди́н, слáвно бо прослáвися.

Запев с поклоном: Святы́и священному́чениче и испове́дниче Дании́ле, моли́ Бо́га о на́с.

Огражда́я слове́сное ста́до свое́, кре́постию ева́нгельскаго уче́ния, и пита́я его́ от зла́к правосла́вия священному́чениче, сохрани́л еси́ его от душепа́губных звере́й.

Запев. Во сла́внем гра́де Москве́, нача́т служе́ние свяще́нное, в Костроме́ же послужи́в приле́жне, и во А́страхани сконча́ тече́ние жи́зни испове́дниче, проте́к я́ко река́ многово́дная, напая́я лю́ди уче́нии богому́дрыми.

Слава. Я́ко па́стырь до́брыи, ева́нгельски положи́л еси́ ду́шу свою́ за óвцы своя́, собо́ю показа́в óбраз тве́рдости в ве́ре, да ся храня́т от ерети́ческих ухищре́нии.

И ныне. Богородичен. Просте́рши дла́ни свои́ к Сы́ну Си́ и Бо́гу Пренепоро́чная, покры́й на́с моли́твами Свои́ми от вся́каго зла́, и спаси́ душа́ на́ша.

Катавасия: Изба́ви от бе́д рабы́ своя́, святы́и священному́чениче и испове́дниче Дании́ле, я́ко вси́ по́ Бозе к тебе́ прибега́ем, ты́ бо мо́лиши о на́с Христа́ Бо́га на́шего (поклон).Го́споди поми́луй (трижды, с поклонами).

Песнь 3-я, ирмос. Ты́ еси́ утвержéние, притекáющим Ти́ Го́споди, Ты́ же све́т омрачéнным, и поéт Тя́ ду́х мо́й.

Запев. Не терпя́ о́тче ви́дети коле́блемы догма́ты правосла́вия, развраще́нием святы́х преда́нии, му́жественне oблича́ше вино́вника смуще́нии церко́вных.

Запев. И́скренныи oбе́щник, и му́дрыи сове́тник преди́вному Па́влу, Авва́куму же до́блему, и ине́м правосла́вию ревни́телєм, бы́л еси́ свя́те, с ни́ми же oблича́ше па́губу отсту́пническую.

Слава. К царю́ земно́му писа́ше со Авва́кумом свя́те, да ути́шит церко́вная смуще́ния, но ничто́же успе́в, все́ упова́ние навы́че к небе́cному Влады́це возлага́ти.

И ныне. Богородичен. Святе́йшую херуви́м ве́мы Тя́ Пресвята́я, и мо́лимтися при́cно: изба́ви ны́ от належа́щих бе́д свои́м непрело́жным предста́тельством пре́д Богом.

Катавасия. Го́споди поми́луй (трижды, с поклонами).

Седaлен, глaс 4-и, подобен «Явися днесь». Проти́вником загради́л еси́ уста́ му́дростию боже́cтвенною, и писа́нии свяще́нными, сего́ ра́ди преда́ша тя́ отсту́пницы томле́ниєм мучи́тельным и сме́рти; те́мже с любо́вию прославля́ем тя́, Дании́ле священному́чениче.

Слава, и ныне. Богородичен. Моли́твенице неусы́пная, Стено́ неoбори́мая, и Прибе́жище ве́рным наде́жное, Богоро́дице Мари́е, моли́ся Сы́ну Своему́, Хриcту́ Бо́гу на́шему, да сохрани́т ны́ от напа́дания вра́жия, и от вре́да сопроти́внаго, я́ко Ми́лоcтив и Человеколю́бец.

Песнь 4-я, ирмос. Услы́шах Го́споди, смотре́ния Твоего́ та́инство, разуме́х де́ла Твоя́, и просла́вих Твое́ Божеcтво́.

Запев. Совлече́ с тебе́ проти́вник благоче́стия свяще́нныя oде́жды, но Христо́с тя́ во oдея́ние ве́чныя сла́вы возoблече́, и черто́гу Своєго́ Ца́рcтвия прича́стия сподо́би.

Запев. В хле́бницу монасты́рскую отсла́ тя́ Дании́ле, на томле́ния теле́сная прего́рдыи мучи́тель, мне́в соврати́ти тя́ с пути́ пра́ваго, но погреши́ неразу́мныи.

Слава. Не тро́сть ве́тром коле́блему, но адама́нта тве́рда oбре́те тебе́ Дании́ле отсту́пник: подве́рг бо тя́ oскорбле́нием и му́кам, невозмо́же поколеба́ти кре́пости твоея́ и сил́ы духо́вныя.

И ныне. Богородичен. К Тебе́ при́cно прибега́ем ве́рнии, во все́х находя́щих на ны́ лю́тых oбстоя́ниих, спаса́еши бо на́с Свои́м заступле́нием Богороди́тельнице.

Катавасия. Го́споди поми́луй (трижды, с поклонами).

Песнь 5-я, ирмос. О́т нощи неве́дения, Богоразу́мием просвещéи концы́, просвети́ мя у́тром, славосло́вия Твоего́ Го́споди.

Запев. Возмути́тель ми́ра церко́внаго, тща́ся все́яти своя́ заблужде́ния, oсужда́ет тя́ во изгна́ние, да никто́же oста́нет воспяща́я дея́ния того́ непра́ведная.

Запев. Не oста́ви мене́ Христе́ мо́й, вопия́ше испове́дниче, непови́нне изгоня́ем в заточе́ние, я́ко да досто́йне возмогу́ пострада́ти до сме́рти, за це́рковь Твою́ святу́ю.

Слава. В подземе́лии те́мне заключа́ем светоно́сче, и гла́дом томи́м пшеницеда́вче, и мра́зом oзнобля́ем те́плыи в ве́ре, но недви́жимо пре́был еси́ в догма́тех, и́миже oгражда́ется Це́ркви Бо́жия, священному́чениче сла́вне Дании́ле.

И ныне. Богородичен. О́т нощи неве́дения, возвела́ еси́ человечество Богоро́дице, проше́дыи бо из Тебе́ Сын Божии, просвети́ све́том богоразу́мия вся́ концы́.

Катавасия. Го́споди поми́луй (трижды, с поклонами).

Песнь 6-я, ирмос. Очи́сти мя́ Спа́се, мно́га бо беззако́ния моя́, и из глубины́ зо́л возведи́ мя молю́ся, к Тебе́ бо возвáх и услы́ша мя́, Бо́же спасéния моего́.

Запев. Во страны́ да́льныя изгна́ша тебе́ мучи́тели, но Бо́г сподо́би тя́ взы́ти в небе́cныи Иеросали́м, иде́же все́м святы́м сликовству́еши, моля́ся о на́с при́cно.

Запев. В подзе́мнем узи́лищи а́ки во́ гробе, жи́в безысхо́дне заключе́н страда́льче, oба́че изведе́ся душа́ твоя́ из темни́цы, во ца́рcтвие све́тлости боже́cтвенныя, му́чеником добр́ото Дании́ле о́тче на́ш.

Слава. Свяще́нницы свяще́нника, и мучениколю́бцы страстоте́рпца дне́сь почти́те, Дании́ла чю́днаго, утверди́вшаго па́ству Хриcто́ву, и за Це́рковь Бо́жию сконча́вшагося.

И ныне. Богородичен. Я́же ра́дость всему́ ми́ру ро́ждьши, Спа́са Христа́, ра́дости духо́вныя испо́лни се́рдце мое́, грехо́вную печа́ль отгоня́ющи Богоро́дице Мари́е. Катавасия. Го́споди поми́луй (трижды, без поклонов). Слава, и ныне.

Кондак, глас 5-и. Вы́шних жела́я, о земны́х же́ небре́гл еси́, и oблича́я злоухищре́ния ерети́ческая, претерпе́л еси́ изгна́ние, заточе́ние в темни́цы, и сме́рть му́ченическую, и ны́не на́ Небесех мо́лишися о душа́х на́ших.

Икос. От ю́ности Христа́ возлюби́л еси́, и Того́ стопа́м после́дова неукло́нно путе́м ева́нгельским, те́мже Госпо́дь сподо́би тебе́ са́на свяще́нническаго, и поста́ви тя́ па́стыря и учи́теля гра́ду Костроме́, и упа́сл еси́ ста́до свое́ благоче́cтне, и спасе́ния ра́ди христия́нскаго, и своея́ души́ от ерети́ческия тли́, претерпе́ти изво́ли изгна́ние и сме́рть, и ны́не на́ небесех мо́лишися о душа́х на́ших.

Песнь 7-я, ирмос. Де́ти еврéйския в пещи́, попрáвше плáмень дерзну́вше, и нá росу о́гнь прело́жьше вопия́ху, благословéн еси́ Го́споди Бо́же во́ веки.

Запев. Дре́вле у́бо проро́к вве́ржен в ро́в, укроти́ львы́ гла́дныя, ты́ же о́тче Дании́ле вве́ржен в темни́цу, сокруши́л еси́ львы́ мы́сленныя.

Запев. Начало во́ждь яви́лся еси́ но́вым му́чеником, и́же пострада́ша от но́вых гони́тель Це́ркве Бо́жия, те́м тя ́прославля́ем священному́чениче Дании́ле.

Слава. Темни́цею привре́менною избы́в темни́цы ве́чныя, и всели́лся еси́ во све́тлостех святы́х, и мо́лишися спасти́ пою́щих тя́.

И ныне. Богородичен. О́т глада губи́тельства, oгня́ и меча́, и междоусо́бныя бра́ни, изба́ви рабы́ своя́, мо́лимтися Богоро́дице Ма́ти животу́.

Катавасия. Го́споди поми́луй (трижды, с поклонами).

Песнь 8-я, ирмос. Богозра́чныя де́ти в пещи́, со oгне́м и ле́сть попра́вше поя́ху, благослови́те дела Госпо́дня Го́спода.

Запев. Понужда́ше тебе́ мучи́тель отступи́ти от Це́ркве Бо́жия, предава́я тя му́кам и сме́рти, но ты яви́лся еси́ я́ко ка́мень несокруши́м.

Запев. Мне́выи я́ко поруга́нием изве́рже тя́ из са́на свяще́нничества, са́м изве́ржен бы́сть из святи́тельскаго са́на я́ко беззако́нник, ты́ же венча́лся еси́ от Бо́га, я́ко священному́ченик.

Слава. В Тро́ице сла́вимому Бо́гу, служи́л еси́ нелицеме́рно вся́ дни́ живота́ своего́, Ему́же ны́не предстоя́ со му́ченики, моли́ся о все́х моля́щихся ти́.

И ныне. Богородичен. Бу́рею грехо́вною порева́ем, прибега́ю к Тебе́ приста́нищу ти́хому Богоро́дице, и вопию́ ти́, спаси́ мя от тлетво́рных ве́тр душепа́губнаго врага́.

Катавасия. Го́споди поми́луй (трижды, с поклонами).

Песнь 9-я, ирмос. Устраши́ся вся́к слу́х, неизречéнна Бо́жия схожéния, я́ко Вы́шнии во́лею сни́де и до́ плоти, от деви́ческаго бо чрéва бы́в у́бо челове́к; те́мже Тя́ Пречи́cтую Богоро́дицу ве́рнии величáем.

Запев с поклоном. Заключе́н во всемра́чнеи темни́це свя́те, но благода́тию Бо́жиею oсиява́ем, ра́довашеся яќо сподо́бился ес́и пострада́ти за ве́ру святу́ю.

Запев. Испове́дниче и́стины, ты Ни́кона еретика́ ко́зни oбличи́выи, наста́ви и на́с и́стинною прему́дростию, отража́ти кова́рная суесло́вия, и́стину попира́ющих ерети́к.

Слава. Моли́твами свои́ми священному́чениче, да́руй изоби́лие плодо́в земны́х, ми́р наро́дом, Це́ркви тишину́ и благоде́нствие, и на́с причасти́тися сподо́би ра́йския пи́щи.

И ныне. Богородичен. Не́бо слове́сное еси́ Богоро́дице, вме́щьшая Творца́ Не́бу и земли́, сподо́би на́с Небе́cнаго Ца́рcтвия, сла́вящих Тя́ вы́шьшую все́х си́л Небе́cных.

Катавасия. Го́споди поми́луй (трижды, с поклонами).

Отпу́ст.Го́споди Ису́се Христе́ Сы́не Бо́жии, моли́тв ра́ди Пречи́стыя Ти́ Ма́тере, и свята́го священному́ченика и испове́дника протопо́па Дании́ла, и все́х святы́х, поми́луй и спаси́ нас, я́ко Бла́г и Человеколю́бец. Ами́нь.