Главная Публикации Персоналии Канон священномученику Афанасию, епископу Иркутско-Амурскому

Темы публикаций

Канон священномученику Афанасию, епископу Иркутско-Амурскому

Тропарь, глас 2-и. Добро́та сы́и епи́скопом и страда́льцем блаже́нне, о́вцы слове́сныя до́бре упа́с, и разруши́в богобо́рных многоплете́нныя се́ти, яви́ся звезда́ путеводи́тельная, и́же в бу́ри безбо́жия вла́емым, святи́телю и му́чениче Афана́сие, моли́ Христа́ Бо́га, спасти́ся душа́м на́шим.

Слава, и ныне. Богородичен, глас той же. Вся́ па́че смы́сла, вся́ пресла́вная Твоя́ Богоро́дице та́инства, чистото́ю запечатле́на, и де́вством храни́ма, Ма́ти разуме́ся нело́жна, Бо́га ро́ждьши И́стиннаго. Того́ моли́ спасти́ся душа́м на́шим.

Канон, глас 2-и, имея краегране́сие: Свята́го Афана́сия сла́вим вси́.

Песнь 1-я, ирмо́с. Пое́м Го́сподеви, в мо́ри дре́вле лю́ди наста́вльшему, и в не́м фарао́на с во́и пото́пльшу, пе́снь побе́дную, я́ко просла́вися.

Запев: Святы́и священному́чениче Афана́сие, моли́ Бо́га о на́с.
Соверши́ Христе́ словеса́ моя́, во́ свете раз́ума свята́го Ева́нгелия Твоего́, да воспою́ благоче́стно, сла́внаго Афана́сия боже́ственную па́мять.

Запев. Вы́шняго просвеще́н заре́ю святи́телю, и апо́столом уподо́бився, му́жески претерпе́ страда́ние, и взя́тся к высоте́ небе́сней, и ны́не со а́нгелы ра́дуешися.

Слава. Я́ко архиере́й ве́рныи, и я́ко пастырь предо́блии, сто́лп же церко́вныи непоколеби́мыи, вели́кая и многосве́тлая звезда́, да почте́тся дне́сь священному́ченик Афана́сии, ве́рным утверже́ние.

И ныне. Ду́шу мою́ озари́ омраче́нную прегреше́ньми, и ослепле́нную лю́тыми похот́еньми, я́же Со́лнце Пра́ведное ро́ждьшая Приснодево, ели́ко бо хо́щеши мо́жеши.

Катавасия: Изба́ви от бе́д рабы́ своя́, святы́и священному́чениче Афана́сие, я́ко вси́ по́ Бозе к тебе́ прибега́ем, ты́ бо мо́лиши о на́с Христа́ Бо́га на́шего.

Го́споди помил́уй (трижды, с поклонами).

Песнь 3-я, ирмо́с. На ка́мени мя ве́ры утверди́, разшири́ уста́ моя́ на враги́ моя́, возвесели́ бо ся ду́х мо́й воспев́ати, не́сть свя́та я́коже Бо́г на́ш, и не́сть пра́ведна па́че Тебе́ Го́споди.

Запев. Терпе́ния твоего́ стрело́ю, устрели́л еси́ Госпо́дня враги́, и мече́м кре́пости ссече́ бесо́вская во́инства му́жески, побе́дныи вене́ц Афанасие восприя́л еси́ блаже́нне.

Запев. Апо́столом подо́бник бы́в блаже́нне, хра́м Христо́в себе́ самого́ соде́ла, из тмы́ неве́рия лю́ди изве́л еси́, трисоста́вному Бо́гови вопия́ше: сла́ва Тебе́ Человеколю́бче.

Слава. Глаго́л твои́х мече́м, вра́жию ле́сть разори́л еси́, кровны́м же тече́нием, дия́вольския полки́ потопи́л еси́, священному́чениче Афана́сие сла́вне.

И ныне. Изба́ви на́с от искуше́нии, и бу́ри помышле́нии Пречи́стая, от вся́каго гне́ва, и вся́каго греха́, гла́да же и губи́тельства, и ве́чнаго Де́во муче́ния.

Катавасия. Го́споди помил́уй (трижды, с поклонами).

Седален, глас 3-и. На заколе́нии сподо́бися жела́емаго конца́, и бы́в Афана́сие предста́тель Христо́ви десны́и, и собесе́дник святы́м а́нгелом, и сла́ве Госпо́дней насле́дник, и моли́твенник о хва́лящих тя́.

Слава, и ныне. Ко́ждо иде́же спаса́ется, в пра́вду та́мо прибега́ет, и ко́е и́но таково́ прибе́жище, я́ко Твое́ Богоро́дице, покрыва́ющее душа́ на́ша.

Песнь 4-я, ирмо́с. Услы́шах Го́споди слу́х Твоего́ смотре́ния, и просла́вих Тя́, Еди́не Человеколю́бче.

Запев. Окропле́н му́чениче неви́нных крове́й твои́х проли́тием, вес́ь све́тел бы́сть, и ко Христу́ пре́йде богоявле́нно, я́ко разу́мное овча́.

Запев. А́нгельски на́ небеси ликовству́я, све́том неизрече́нным озаря́емь Божества́, я́ко имы́и дерзнове́ние, за ны́ помоли́ся, дарова́ти нам исцеле́ние и оставле́ние грехо́в.

Слава. Фи́нику уподо́бився процве́л еси́ пра́ведниче, во дворе́х Бо́га на́шего, и я́ко ке́др умно́жился еси́, и я́ко ма́слина яви́лся еси́, еле́ом де́л твои́х все́х умаща́я сердца́, ве́рою хва́лящих тя́.

И ныне. Ма́ти Присноде́во, я́ко чи́стую Тя́ Сло́во Бо́жие возлюби́, в Теб́е вопло́щься, обнови́ па́дшаго челове́ка, те́мже Своего́ уго́дника просла́ви.

Катавасия. Го́споди помил́уй (трижды, с поклонами).

Песнь 5-я, ирмо́с. Све́та Пода́телю, и веко́м Тво́рче Го́споди, во́ свете Твои́х повеле́нии наста́ви на́с, ра́зве бо Тебе́ ино́го бо́га не зна́ем.

Запев. А́гнец сы́и без поро́ка, и да́р всесоверше́н са́м себе́ принесе́ Творцу́, пострада́в и победи́в пре́лесть безбо́жную, му́чеником удобре́ние Афана́сие.

Запев. Ны́не река́ боже́ственных и честны́х ти крове́й, ре́ки безбо́жия иссуши́ла е́сть святи́телю, ве́рных же сердца́ напои́ла е́сть.

Слава. Афана́сие свя́те Кресто́м Христо́вым, огражда́ем я́ко ору́жием непобеди́мым, и си́лу сопроти́внаго победи́л еси́, и до конца́ сего́ бе́з вести сотвори́.

И ныне. И́же во́лею вся́ соде́лавыи, во́ чрево неискусобра́чное изво́ли всели́тися, и́же растле́вшееся естество́ на́ше, нетле́нием обогати́л е́сть, я́ко милосе́рд.

Катавасия. Го́споди помил́уй (трижды, с поклонами).

Песнь 6-я, ирмо́с. Бе́здна грехо́в обы́де мя после́дняя, но я́коже проро́ка Ио́ну, Го́споди Го́споди, возведи́ от тли́ живо́т мо́й.

Запев. Своему́ оте́чествию свя́те Афана́сие я́ко со́лнце возсиял еси́, те́м твою́ светоно́сную и честну́ю пра́зднующе па́мять, вся́кия ско́рби избавля́емся.

Запев. Ису́су Сла́дкому принося́ свяще́нныя же́ртвы, са́м себе́ же́ртву Влады́це принесе́, Того́ моли́ возвести́ из тли́ живо́т на́ш.

Слава. Яви́ся блаже́нне удобре́ние му́чеником, и сопресто́льник апо́столом, святи́телем святы́м и а́нгелом сослуже́бник, житию́ те́х уподо́бився.

И ныне. Твое́ боже́ственное Рожество́ Пречи́стая обнови́ на́с, и ча́да показа́ Преве́чному Све́ту, и спа́сшеся взыва́ем, ра́дуися Неве́сто Неневе́стная.

Катавасия. Го́споди помил́уй (трижды, без поклонов). Слава, и ныне.

Кондак, глас 4-и. И́же безсме́ртию тезоимени́таго святи́теля, и правосла́вию наста́вника, и́стиннаго му́ченика, свети́льника сиби́рския земли́, восхва́лим си́це взыва́юще: от бе́д изба́ви ны, при́сно твои́ми мольба́ми, о́тче на́ш Афана́сие.

Икос. Мо́ре Байка́льское восплещи́ волна́ми, го́ры взыгра́йтеся я́ко о́вни, и хо́лми я́ко а́гньцы о́вчии, созыва́юще вся́ ве́рныя боже́ственне возвесели́тися, си́це пою́ща: ра́дуися, му́чеником украше́ние. Ра́дуися, святи́телем лепото́. Ра́дуися, благоче́стия прозябе́ние че́стно. Ра́дуися, похвало́ оте́честву своему́. Ра́дуися, Ца́рствию Небе́сному прича́стниче. Радуися, па́стырю до́брыи, ду́шу свою́ положи́выи за овца́ своя́, о́тче на́ш Афана́сие.

Песнь 7-я, ирмос. Купина́ в горе́ огне́м паля́щи, и оброси́ма пе́щь халде́йская, я́ве прописа́ Тя́ Богоневе́стная: боже́ственныи бо безпло́тныи, в пло́тне чре́ве, О́гнь неопа́льно прия́т, те́м из Тебе́ Ро́ждьшагося пое́м, благослове́н Бо́г оте́ц на́ших.

Запев. Светода́вцу Христу́ прине́сл еси блаже́нне, ве́ру нескве́рну, наде́жу непосты́дну, и любо́вь нелицеме́рну, все́х созыва́я пе́ти: благослове́н Бо́г оте́ц на́ших.

Запев. Ле́сть безбо́жную попра́л еси́ и анти́христово нече́стие, богобо́рцев же суему́дрие посрами́л еси́, о́тче Афана́сие, вся́ науча́я Го́сподеви пе́ти: благослове́н Бо́г оте́ц на́ших.

Слава. А́вель сы́и но́выи, па́стырь овца́м бы́сть святи́телю, убие́ние от но́ваго Ка́ина терпя́ взыва́ше: благослове́н Бо́г оте́ц на́ших.

И ныне. Рожество́ Твое́ дре́вле пе́щь прообража́ше Всенепоро́чная, о́троки бо́ не опали́, я́ко же утро́бу Твою́ О́гнь боже́ственныи, Ему́ же пое́м, благослове́н Бо́г оте́ц на́ших.

Катавасия. Го́споди помил́уй (трижды, с поклонами).

Песнь 8-я, ирмо́с. О подо́бии зла́те небрего́ша пресла́внии от́роцы, неизме́нныи живы́и Бо́жии о́браз ви́девше, среди́ пла́мене поя́ху: осу́щественная по́й Го́спода вся́ тва́рь, и превозноша́й Его́ во́ веки.

Запев. Всесве́тлу звезду́ тя́ показа́ Христо́с, на высоте́ церко́вней му́чениче, воис́тину во страда́ниих светя́щуся, вселе́нную всю́ озаря́ющу взыва́я: Го́спода вся́ де́ла по́йте, и превозноси́те Его́ во́ веки.

Запев. Изво́лил еси́ па́че живота́ умрети́, муче́ния вене́ц любя́ прия́ти, его́ же нося́ в вы́шнем ца́рствии Афана́сие лику́еши, воспева́я: Го́спода вся́ де́ла по́йте, и превозноси́те Его́ во́ веки.

Слава. Ми́ром пома́зан боже́ственным священноде́телю, проли́тием ти́ кро́ве, все́х пе́ти науча́я: Го́спода вся́ де́ла по́йте, и превозноси́те Его́ во́ веки.

И ныне. И́же дре́вле во о́гненней пещи́, ю́ноши прообрази́ша Твою́ неопали́мую утро́бу, огне́м Божества́ прохлажд́аеми, Его́ же прии́мши породи́ Бо́га Сло́ва пою́щим: Го́спода вся́ де́ла по́йте, и превозноси́те Его́ во́ веки.

Катавасия. Го́споди помил́уй (трижды, с поклонами).

Песнь 9-я, ирмо́с. Я́же пре́жде со́лнца свети́льника Бо́га возсия́вша, пло́тию к на́м пришедша, из боку́ Деви́чу неизрече́нно вочелове́чьшася, благослове́нная чи́стая, Тя́ Богоро́дице велича́ем.

Запев. Ви́дети сла́ву Вседержи́теля жела́я, обнови́л еси́ души́ кре́пость, и сла́вою обогати́ся Небе́сною, и ны́не со дерзнове́нием предстоя́ Христо́ви Афана́сие, моли́ся о ста́де свое́м о́тче н́аш.

Запев. Срето́ша тебе́ Афана́сие, чи́ни а́нгельстии и пра́ведных собо́ри возвесели́шася, и от вседержи́тельныя десни́цы Влады́чни венча́ся, те́м тя́ досто́йно велича́ем.

Слава. Испове́дниче и му́чениче свя́те Афана́сие, кре́пкии ка́меню ве́ры, Ду́ху Свято́му сосу́де избра́нныи, не премолчи́ вопия́ за ны́ ко́ Господу.

И ныне. Исполне́ние благи́х Свои́ма рука́ма нося́щи Богоневе́стная, испо́лни мольбы́ ра́б Свои́х, и к Бо́гу ше́ствия на́ша испра́ви, в доброде́телех жи́ти на́с укрепля́ющи.

Катавасия. Го́споди помил́уй (трижды, с поклонами).

Стихера по 50-м псалме, глас 6-и. Во́лею принесе́ся Го́сподеви своему́, я́ко всесожже́ние жи́во и одушевле́нно, и же́ртва благоприя́тна и прече́стна, те́м же бу́ди моли́твенник те́пл, от бу́ри изыма́я ста́до твое́, ве́рою призыва́ющих и пою́щих тя́, святи́телю Христо́в Афана́сие.

Отпу́ст: Го́споди Ису́се Христе,́ Сы́не Бо́жии, моли́твами Пречи́стыя Ти Ма́тере, и свята́го священному́ченика Афана́сия, епи́скопа Ирку́тско-Аму́рскаго, и все́х святы́х, поми́луй и спаси́ на́с, я́ко Бла́г и Человеколю́бец. Ами́нь.